| | Of lordis and of ladies hym aboute | |
| | Suche wondryng was therof this hors of bras | |
| | That sethen the grete sege of troye was | |
| | There as men saw suche an hors also | |
| 300 | Ne was ther suche a wondryng as was tho | |
| | But finally the kyng asked the knyght | |
| | The vertu of this courser and the myght | |
| | And prayde to telle hym his gouernaunce | |
| | The hors anon gan to trippe and daunce | |
| 305 | Whan that this knyght leyde hond on his reyne | |
| | And sayde sire ther is nomore to sayne | |
| | But if yow list to riden ony where | |
| | Ye muste trille a pyn that stont in his ere | |
| | Whiche I shal you telle betwix vs two | |
| 310 | Ye moot nempne hym to what place also | |
| | Orto what cuntre ye list to ryde | |
| | And whan ye come there ye list abyde | |
| | Byd hym descende and trille another pyn | |
| | For there ynne lith the effect of al the gyn | |
| 315 | And he wol doun descende and do al your wil | |
| | And in that place he wolde abyde stil | |
| | Theygh al the worlde hadde the contrary swore | |
| | He shal not thens be drawe ne bore | |
| | And or if you list bidde hym thens goon | |
| 320 | Trille this pynne and he wol vanysshe anon | |
| | Out of the sighte of euery maner wight | |
| | And come ayen be it be day or nyght | |
| | Whan that yow list clepyn hym ayeen | |
| | In suche a gyse as I shal to you seyn | |
