| | Kepyng the boundis of my worship euer | |
| | Ne neuer hadde y thing so leef ne leuer | |
| 565 | As hym god woot ne neuer shal nomo | |
| | This lastid lenger than a yeer or two | |
| | That I supposid of hym no thing but good | |
| | But finally thus at the laste it stood | |
| | That fortune wolde that he must twynne | |
| 570 | Out of that place whiche I was Inne | |
| | Where me was woo it is no questioun | |
| | I can not make of it discripcion | |
| | For o thing dar y telle boldly | |
| | I knowe what the peyne of deth is therby | |
| 575 | Suche harm I mette that he ne mighte me leue | |
| | So on a day of me he took his leue | |
| | So sorowfully eke that y wende verily | |
| | That he hadde felt as muche sorow as I | |
| | When that I herde hym speke & saw his hewe | |
| 580 | But neuerthelesse I thoughte he was so trewe | |
| | And eke that he repayre sholde agayn | |
| | With ynne a litil whyle soth to sayn | |
| | And reson wolde eke that he moste go | |
| | For his honour and ofte it fallith so | |
| 585 | That I made vertu of necessite | |
| | And took it wel syn it nedes moste be | |
| | As I best myghte I hid fro hym my sorow | |
| | And took hym be the hond seint Iohn to borow | |
| | And I sayde thus lo I am youris al | |
| 590 | Bothe suche as I haue be to you and shal | |
| | What he answerde nedith not to reherce | |
