| | As londis rentis pasturis and comune | |
| | Or othir yeftis meuable of fortune | |
| | That passen as a shadow on a wal | |
| | But drede not yf I playnly speke shal | |
| | A wyf wil laste and in thy hous endure | |
| | Wel lenger than the liste perauenture | |
| 75 | Mariage is a ful greet sacrament | |
| | Who that hath no wyf is but shent | |
| | He liuyth helples and is al desolat | |
| | I speke of folk in seculer astat | |
| | And herken why y say not this for nought | |
| 80 | The womman is for mannys help y wrought | |
| | The high god whan he hadde Adam makid | |
| | And saw hym allone bely nakid | |
| | God of his grete goodnesse sayde than | |
| | Let vs now make an help to this man | |
| 85 | Lik to hym self and than he made eue | |
| | Here may ye se and here by preue | |
| | That a wyf is mannys help & his comfort | |
| | His paradyse terrestre and his disport | |
| | So buxum and so vertuous is she | |
| 90 | They muste nedis liue in vnite | |
| | O flessh they be and of o blood I gesse | |
| | Not but one herte in wyl and in distresse | |
| | A wyf a saynte mary benedicite | |
| | How mighte a man haue ony aduersite | |
| 95 | That hath a wyf certis I can not sey | |
| | The blisse that is betwix hem twey | |
| | Ther may no tunge telle it or herte thynke | |
