| | Shulde haue be slayn and loke hester also | |
| | Be good counsel deliuered out of wo | |
| | The pepyl of god and made Mardoche | |
| 130 | Of assuere enhaunced forto be | |
| | Ther is no thing in gre superlatif | |
| | As saith Senek aboue an humble wyf | |
| | Suffre thy wyuys tunge as Caton bit | |
| | She shal comaunde and thou shalt suffre it | |
| 135 | And yet she wylle obeye of curtesie | |
| | A wyf is keper of thy husbondrye | |
| | Wel may the seek man bewayle and wepe | |
| | There as no wyf is the hous to kepe | |
| | I warne the if thou wysely wilt wirche | |
| 140 | Loue wel thy wyf as crist loueth his chirche | |
| | If thou louest thy self thou louest thy wyf | |
| | Noman hatith his flessh but in his lif | |
| | He suffrith it and therfore bidde I the | |
| | Cherisshe thy wyf or thou shalt neuer the | |
| 145 | Husbonde and wyf what so men iape or pley | |
| | Of wordly folk holden the right wey | |
| | They been knyt thermay no harm betide | |
| | And namely on the wyuys side | |
| | For whiche this Ianuary of whiche I tolde | |
| 150 | Considerith hath in his dayes olde | |
| | The lusty lif the vertuous quyete | |
| | That is in mariage hony swete | |
| | And for his frendis on aday he sent | |
| | To telle the effect of his entent | |
| 155 | With face sad he hath his tale to hem told | |
