| | I fele my lymys stark and sufficiaunt | |
| 215 | To do al that aman behoueth to do | |
| | And am strong ynough to ride or goo | |
| | Though I be hoor and fare as doth a tre | |
| | That blosmeth or that the tre grene be | |
| | A blosmed tre is neyther drye ne ded | |
| 220 | I fele me no where hoor but on myn hed | |
| | My herte and my lymes is ay grene | |
| | As laurer that thorow the yeer is sene | |
| | And sithnys ye haue herd al myn entent | |
| | I pray you that to my wyl ye assent | |
| 225 | Diuers men diuersly hym tolde | |
| | Of mariage meny ensamplis olde | |
| | Som blamed it some preysid it certeyn | |
| | But at the laste shortly forto seyn | |
| | As alday falleth altercacion | |
| 230 | Betwix frendis in disputacion | |
| | Ther fyl a strif betwix his bretheren two | |
| | Of whiche that on was clepid placebo | |
| | Placebo sayde o Ianuary brother | |
| | To you telle I this tale and to non other | |
| 235 | Ful litil nede had ye my lord so dere | |
| | Counsel to axe of ony that is here | |
| | But that ye be on so ful of sapience | |
| | That you ne likith for your high prudence | |
| | To weyue fro the word of Salamon | |
| 240 | This word sayde he to vs euerichon | |
| | Worke al thing be counsel thus sayde he | |
| | And than shalt not thou repente the | |
