| | So they wroughte be slighte and by trete | |
| | That this mayde whiche that may highte | |
| 450 | As hastely as that they myghte | |
| | Shal weddid be vnto Ianuary | |
| | I trowe it were you to longe to tary | |
| | If I you tolde of euery escrit and bond | |
| | Be whiche she was feffed in his lond | |
| 455 | Othir forto harke of her riche aray | |
| | But finally comyn is the day | |
| | That to chirche bothe been they went | |
| | Forto resceyue the holy sacrement | |
| | Forth comyth þe preest with stole aboute his neck | |
| 460 | And bad hir be like Sarra or Rebek | |
| | In wisedom and trouthe of mariage | |
| | And sayde his orisons in his vsage | |
| | And crowchid hem & bad god sholde hym bles | |
| | And made al siker ynow with holiues | |
| 465 | Thus been they weddid with solempnyte | |
| | And at the feste sittith he and she | |
| | With other worthy folk vp on the deys | |
| | Al ful of ioye and blisse is the Paleys | |
| | And ful of instrumentis of and vitayl | |
| 470 | The moste deynteous of alle Itayl | |
| | Beforn hym with instrumentis of suche a soun | |
| | That Orpheus of Thebes or Amphioun | |
| | Ne made neuer suche a melodye | |
| | At euery cours cam loude mynstralsie | |
| 475 | That neuyr Ioab trompid forto here | |
| | Neyther he Theomodas half so clere | |
