| | Who studieth now but fayre fresh may | |
| | And doun be Ianuary she lay | |
| | That slepte til the cow hath hym wakid | |
| | Anon he preyde her to strype her nakid | |
| 715 | He wolde of here he sayde haue sum plesaunce | |
| | He sayde her clothis doth hym cumbraunce | |
| | And she obeyeth be she leef or loth | |
| | But lest that precious folk with me be wroth | |
| | How that he wroughte y dar you not telle | |
| 720 | Or whether he thoughte it paradyse or helle | |
| | But I lete hem worche in her wyse | |
| | Til euensong and that he muste aryse | |
| | Were it be destyne or be auenture | |
| | Were it be influence or be nature | |
| 725 | Other constillacion that in suche astat | |
| | The heuyn stood that tyme fortunat | |
| | Was forto put a bil of venus werkis | |
| | For al thing hath tyme as sayn clerkis | |
| | To ony womman forto gete her loue | |
| 730 | I can not sey but grete god aboue | |
| | That knoweth non acte is causelees | |
| | He demyth al for I wol holde my pees | |
| | But soth it is this how that this fressh may | |
| | Hath take suche impression that day | |
| 735 | Of pyte of this sik man Damyan | |
| | That fro hir herte she ne dryue can | |
| | The remembraunce forto do hym ese | |
| | Certeyn though whom this thing displese | |
| | I here recke not I hym assure | |
