| | I yeue it vp but sith I sweer myn oth | |
| | That I wyl graunte hym his sighte agen | |
| 1070 | My word shal stonde I say you certeyn | |
| | I am a kyng it sit me not to lye | |
| | And I a quene quod she of the feirye | |
| | Her answer shal she haue I vndertake | |
| | Lete vs nomo wordis here of make | |
| 1075 | For soth I wol you no lenger tary | |
| | Now lete vs turne ayen to Ianuary | |
| | That in the gardyn with his fresh may | |
| | Syngith ful merier than the Popingeay | |
| | Yow loue y best and shal and other non | |
| 1080 | So longe aboute the aleyys is he goon | |
| | Tyl he was come ayens that pery | |
| | Where as this damyan sittith ful mery | |
| | An high among the fresh leuys grene | |
| | This fresh may that is so bright and shene | |
| 1085 | Gan forto sighe and sayde allas my syde | |
| | Now sire quod she for aught that may betyde | |
| | I muste haue of the peris that I se | |
| | Or y muste dye so sore longith me | |
| | To ete of the smale peris grene | |
| 1090 | Help for hir loue that is of heuen quene | |
| | I telle you wel a womman in my plit | |
| | May haue in fruyt so gret an appetit | |
| | That she may dien but she of it haue | |
| | Allas quod he that I ne hadde here a knaue | |
| 1095 | That coude clymbe allas quod he | |
| | For I am blind ye sire no force quod she | |
