| | I wolde haue told his counsel euerydell | |
| | And so I did ful ofte god it woot | |
| 540 | That made his face ful ofte reed and hoot | |
| | For verry shame and blamed hym self that he | |
| | Hadde told to me so gret a priuyte | |
| | And so be fyl that onys in a lente | |
| | So ofte tyme I to my gossib wente | |
| 545 | For euer I loued to be gay alleway | |
| | And forto walke in March aperyl and May | |
| | Fro hous to hous to here sondry talis | |
| | That Iankyn clerk and my gossib dame alis | |
| | And I my self in to the feldis wente | |
| 550 | My husbond was at london al that lent | |
| | I hadde the bettir leyser forto pleye | |
| | And forto se and eke forto be seye | |
| | Of lusty folk what wiste I where my grace | |
| | Was shapyn forto be or in what place | |
| 555 | Therfore I made my visitacions | |
| | To vigilis and to processions | |
| | To prechinge eke and to pilgremagis | |
| | To pleyis of myraclis and to mariagis | |
| | And werid vp on my gay scarlet gites | |
| 560 | Thyse wormys ne these mowthis ne thyse mytis | |
| | Vpon my parel frayde hem neuer adeel | |
| | And wost thow why for they were vsed wel | |
| | Now wol I telle forth what happid me | |
| | I say that in the feldis walkid we | |
| 565 | Til truly that we hadde suche daliaunce | |
| | This clerk and I what of my purueaunce | |
