| | Assemblid ben his answer for to here | |
| | And aftirward this knyght was bodin tapere | |
| | And that euery wight was comaundid silence | |
| 1005 | And that the knyght sholde telle in audience | |
| | What thing that wordly women loue best | |
| | This knyght stood not stille as doth a beest | |
| | But to his question anon answerde | |
| | With manly voys that al the court it herde | |
| 1010 | My liege lady thenne general quod he | |
| | Women desiren to haue souereynte | |
| | As wel of her husbondis as of hir loue | |
| | And forto ben in maistrye aboue | |
| | This is your most desire though ye wil me kille | |
| 1015 | Doth as you list I am at your wylle | |
| | In al the court ne was ther wyf ne mayde | |
| | Ne widow that contraried that he sayde | |
| | But sayde he was worthy to haue his lyf | |
| | And at that word vpstert this olde waf | |
| 1020 | Whiche that the knyght saw sittynge on the grene | |
| | Mercy quod she my souerein lady quene | |
| | Er that your court departe as doth me right | |
| | I taught this answer vnto the knyght | |
| | For whiche he plighte me his trouthe there | |
| 1025 | The firste thing I wolde hym require | |
| | He wolde hit do yf it lay in his myght | |
| | Befor this court than I pray the sir knyght | |
| | Quod she that thou me take vnto thy wyf | |
| | For wel thou wotist that I haue saued thy lyf | |
| 1030 | If I swere fals swere nay vpon thy fey | |
