| 1060 | And sayde o dere husbonde benedicite | |
| | Farith euery knyght with his wyf as ye | |
| | Is this the lawe of kyng Artours hous | |
| | Is euery knyght of his loue so daungerous | |
| | I am your owen loue and eke your wyf | |
| 1065 | I am she whiche that saued hath your lyf | |
| | And certis yet I dede you neuer vnright | |
| | Why fare ye thus with me the firste nyght | |
| | Ye fare lik a man hadde lost his wit | |
| | What is my gilt for goddis loue tel me it | |
| 1070 | And it shal be amended yf that I may | |
| | Amendid qd this knyght alas nay nay | |
| | It wol not be amendid neuer the mo | |
| | Thow art so lothly and so olde also | |
| | And therto comyn of so low a kynde | |
| 1075 | That litil wonder is though I walow & wynde | |
| | So wolde to god quod he myn herte wolde breste | |
| | Is this quod she the cause of your vnreste | |
| | Ye certeyn quod he no wonder it is | |
| | Now sire qd she I coude amende al this | |
| 1080 | Yf that me list or hit be daies thre | |
| | So wel ye mighte bere you vnto me | |
| | But for ye spekyn of suche gentilnes | |
| | As is descendid out of old riches | |
| | That therfore ye shulbe gentilmen | |
| 1085 | Suche arrogaunce is not worth an hen | |
| | Loke who is most vertuous alwey | |
| | Pryuy and apert and most entendith ay | |
| | To do the gentilist dedis that he can | |
