| | Pouert a spectakil is as thinkith me | |
| | Thorow whiche he may his very frendis se | |
| | And therfore sir sith therin ye be greued | |
| | Of my pouert late me nomore be repreued | |
| 1180 | Now sire of elde also ye repreuyd me | |
| | And certis sire though non auctorite | |
| | Were in the book the gentil of hauour | |
| | Sayn that men sholde an olde wyf do honour | |
| | And clepid fader for their gentilnes | |
| 1185 | And auctours shal I fynde as I ges | |
| | Now there as ye say I am foul and old | |
| | Than drede ye not to be made Cokeold | |
| | For filthe elde and foul so mot I the | |
| | Been grete wardeyns vpon chastite | |
| 1190 | But natheles sith I knowe your delit | |
| | I shal fulfille your wordly appetit | |
| | Chees now qd she on of thyse thingis tweye | |
| | To haue me olde and foul til that I deye | |
| | And be to you a trewe humble wyff | |
| 1195 | And neuer you displese in al my lyff | |
| | Or ellis ye shal haue me yong and feyr | |
| | And take your auenture of the repeyr | |
| | That to youre hous shal be by cause of me | |
| | Or in som other place may wel be | |
| 1200 | Now chees whether that ye likith | |
| | This knyght auysith hym and sikith | |
| | But at the laste he sayde in this manere | |
| | My lady my loue and my wyf so dere | |
| | I put me fully in your wyse gouernaunce | |
