| | And neer the feend he drow as naught ne were | |
| 250 | Ful priuely and rowned in his ere | |
| | Herkyn my brother herkyn be thy feith | |
| | Herist thou not hou the carter seith | |
| | Take hit anon for he hath yeue it the | |
| | Both hey and carte and eek his capullis thre | |
| 255 | Nay quod the deuyl / god woot neuer a deel | |
| | It is not his entent trust me weel | |
| | Aske hym self yf that thou trowest not me | |
| | Or ellis stynt awhyle and thou shalt se | |
| 260 | This carter thackid his hors on the croupe | |
| | And they begonne to drawe and to stoupe | |
| | Hait now quod he that Ihesu crist you bles | |
| | And al his hondy work bothe more and les | |
| | That was wel y twight myn owen liard boy | |
| 265 | I pray to god saue the and saint loy | |
| | Now is my carte out of the slowgh parde | |
| | Lo brother quod the fend what tolde I the | |
| | Here may ye se myn owen dere brother | |
| | The chorle spak o thing but he thoughte another | |
| 270 | Lat vs go forth aboute our viage | |
| | Here wynne I no thing vpon this cariage | |
| | Whan that they comyn somwhat out of the toun | |
| | This sompnour to his brothir gan to roun | |
| | Brother quod he here wonyth an old rebecke | |
| 275 | That hadde almost as leef to lese her necke | |
| | As forto yeue a peny of her good | |
| | I wol haue . xij d . though that she be wood | |
| | Or I wol somone hir vnto our office | |
