| 40 | Or ellis what you list I may not chese | |
| | A goddis half peny or a masse peny | |
| | Or yeue vs of your braun yf ye haue ony | |
| | A dagget of your blanket leue dame | |
| | Our sustir dere lo here I wryte your name | |
| 45 | Bacon or chese or suche thing as ye fynde | |
| | A sturdy harlot wente hym ay behynde | |
| | That was hir oste and euer he baar a sak | |
| | And what men yaf hym leyde it on his bak | |
| | And whan he was oute atte dore anoon | |
| 50 | He planed awey the namys euerichon | |
| | That he beforn hadde wryte in his tablis | |
| | He seruyd hem with nyflis and with fablis | |
| | Nay there thou liest Sompnour quod the frere | |
| | Pees quod our ost for cristis modir dere | |
| 55 | Tel forth thy tale and spare it nat at al | |
| | So thryue y quod the sompnour so I shal | |
| | So longe he wente from hous to hous til he | |
| | Cam to an hous there he was wont to be | |
| | Refresshid more than in an hundrid placis | |
| 60 | Seke lay the good man whoos the place is | |
| | Bedrede vp on a bench lowe he lay | |
| | Deus hic quod he O Thomas good day | |
| | Sayde this frere curtesly and fre | |
| | Thomas god yelde you ful ofte tyme quod he | |
| 65 | I haue on this bench I fare ful weel | |
| | Here haue I etyn many a mery meel | |
| | And fro the benche he droof a wey the cat | |
| | And leyde a doun his potent and his hat | |
