| | With many a teer trillyng on my cheek | |
| | Withouten noyse and clatering of bellis | |
| | Te deum was our song and no thing ellis | |
| | Sone aftir to crist I bad an holy orisoun | |
| 160 | Thankynge hym of my good reuelacioun | |
| | For sire and dame trustith me right weel | |
| | Our orisons been more effectuel | |
| | And more we se of cristis secret thingis | |
| | Than borel pepil al be they kyngis | |
| 165 | We lyue in pensifnesse and in abstinence | |
| | And borel folk in riches and dispence | |
| | Of mete and drynke and in foul delyte | |
| | We haue the worldis lust al in despit | |
| | Lazar and diues liueden ful diuersly | |
| 170 | And diuers guerdoms had they ther by | |
| | Who so wol praye muste faste and be clene | |
| | And fatte his soule and make his body lene | |
| | We fare as saith the Apostil cloth and food | |
| | Suffisith vs though they be not ful good | |
| 175 | The clennesse and the fastynge of vs freris | |
| | Makith that Crist exceptith our praieris | |
| | Lo moyses .xl. daies and .xl. nyght | |
| | Fastid or that god ful of his myght | |
| | Spak with hym in the mount Synay | |
| 180 | With empty wombe of fastynge many a day | |
| | There resceyued he the lawe that was writyn | |
| | With goddis fynger and Ely wel ye wetyn | |
| | In the mounte Oreb or he hadde ony speche | |
| | With high god that is our lyuys leche | |
