| | For which this markis wroughte in this manere | |
| | He cam a lone a nyght there as she lay | |
| 465 | With sterne face and right ogly chere | |
| | And sayde thus Grisilde quod he that day | |
| | That I you took fro your poure aray | |
| | And put you in astaat of high noblesse | |
| | Ye haue not that forgotyn as I gesse | |
| 470 | I say Grisilde the present dignite | |
| | In whiche I haue put you as I trow | |
| | Makith you not foryetful forto be | |
| | That I you took iu poure astat fullowe | |
| | For ony weel ye muste your self knowe | |
| 475 | Take hede of euery word what I seye | |
| | Ther is no wight that herith but we twey | |
| | Ye woot your self how that ye cam here | |
| | In to this hous it is not longe ago | |
| | And though to me ye be bothe leef and dere | |
| 480 | Vnto my gentils ye be no thyng so | |
| | They say to hem it is greet shame and woo | |
| | Forto be subiect and been in seruage | |
| | To the that born art in so smal a vilage | |
| | And namely sith thy doughter was y bore | |
| 485 | These wordes haue they spoken doutlees | |
| | But I desire as I haue don before | |
| | To lyue my lif with hem in reste and pees | |
| | I may not in this caas be recheles | |
| | I moot doon with thy doughter for the beste | |
| 490 | Nat as I wolde but as my pepyl leste | |
| | And yet god woot this is ful loth to me | |
