| 550 | That she muste hir child kisse onys or it deide | |
| | And in her arme she the litil child leyde | |
| | With ful sad face and gan the child to blis | |
| | And lullid it and aftir gan it kisse | |
| | And thus she sayde in her benigne vois | |
| 555 | Farwel my child I shal the neuer se | |
| | But sith I haue the markid with the holy crois | |
| | Of thilke fader blissed moot thou be | |
| | That for vs deide vpon the cros of tre | |
| | Thy soule litil child I hym betake | |
| 560 | For this nyght shalt thou dye for my sake | |
| | I trow that to a norice in this caas | |
| | It hadde be grete rowthe forto se | |
| | Wel mighte a moder than haue cride allas | |
| | But natheles so sad and so stedfast was she | |
| 565 | That she endurid al aduersite | |
| | And to the seriaunt mekely she sayde | |
| | Haue here agayn your litil yong mayde | |
| | Gooth now quod she and doth my lordis heste | |
| | But o thing wol I pray you of your grace | |
| 570 | That but my lorde forbad it you atte leste | |
| | Burieth this litil body in som place | |
| | That bestis ne foulis it to Rase | |
| | But he to that purpos no word wolde say | |
| | But toke the childe and wente vp on his way | |
| 575 | This seriaunt cam to the lord agayn | |
| | And of Grisildis wordis and of her chere | |
| | He tolde hym poynt by poynt short and pleyn | |
| | And hym presentid with his doughter dere | |
