| 1040 | For she is fostrid in her norisshinge | |
| | More tenderly and to my supposinge | |
| | She coude not aduersite wel endure | |
| | As coude a poure fostrid creature | |
| | And whan this walter saw her pacience | |
| 1045 | Her glad chere and no malice at al | |
| | And he so ofte hadde do to her offence | |
| | And she ay constant and sad as a wal | |
| | Contynuynge euer here Innocence ouer al | |
| | This sturdy Markis gan his herte dresse | |
| 1050 | To rewe vp on her wifly stedfastnes | |
| | This is ynow Grisilde myn quod he | |
| | Be now nomore agast ne euyl apayd | |
| | I haue thy feith and thy benignite | |
| | As wel as euer woman was a said | |
| 1055 | In gret astat or pouerly araid | |
| | Now knowe I dere wyf thy stedfastnes | |
| | And here in armys took and gan her kysse | |
| | And she for wonder took of hym no kepe | |
| | She herde not what thing he to her sayde | |
| 1060 | She farid as she hadde stert out of her slepe | |
| | Til she out of hir masidnes abreyde | |
| | Grisilde quod he be god that for vs deyde | |
| | Thow art my wyf non other I haue | |
| | Ne neuer I hadde as god my soule saue | |
| 1065 | This is thy doughter whiche thou hast supposid | |
| | To be my wyf that othir feithfully | |
| | Shal be myn heir as I haue disposid | |
| | Thou baar hym in thy body ful trewly | |
