| | Than was the reuel of hir mariage | |
| | Ful many a yeer in high prosperite | |
| | Lyuen thyse two in concorde and in reste | |
| 1130 | And richely his doughter maried he | |
| | Vnto a lord on of the worthiest | |
| | Of al Itail and than in pees and reste | |
| | His wyuys fader in his court he kepith | |
| | Til the soule out of the body crepith | |
| 1135 | His sone succedith in his heritage | |
| | In reste and pees aftir his fadris day | |
| | And fortunat was eke in mariage | |
| | Al put he nat his wyf in gret assaye | |
| | This worlde is not so strong it is no nay | |
| 1140 | As it hath been in olde tymes yore | |
| | And herkith what this auctor saith therfore | |
| | This story is said nat for that wyuys sholde | |
| | Folow Grisilde as in high humylyte | |
| | For it were importabil though they wolde | |
| 1145 | But for that euery wight in his degre | |
| | Sholde be constant in al aduersite | |
| | As was Grisilde wherfore Petrark writith | |
| | This story whiche with high stile enditith | |
| | For sith a woman was so pacient | |
| 1150 | Vnto a mortal man wel more we oughte | |
| | Receyuen al in good that god vs sent | |
| | For gret skill is I preue that he wrought | |
| | But he ne temptid noman that he bought | |
| | As saith saint Iame yf ye his pistil rede | |
| 1155 | He preuyth folk but a day it is no drede | |
