| 425 | For holy chirche saith in our beleue | |
| | Ne suffrith not illusion vs to greue | |
| | And whan this book was in remembraunce | |
| | Anon for ioye his herte gan to daunce | |
| | And to hym self he sayde priuely | |
| 430 | My brothir warisshed shal be hastely | |
| | For I am siker ther be sciences | |
| | Be whiche men make diuers apparencis | |
| | Whiche alle thyse subtil tregetouris pley | |
| | For ofte at festis haue I herd seye | |
| 435 | That tregetouris withynne an halle large | |
| | Haue made come in watir in a barge | |
| | And in the halle rowen vp an doun | |
| | Som tyme hath semed come a greet lioun | |
| | And som tyme flouris spryngyng in a mede | |
| 440 | Som tyme wyne and grapis whyte and rede | |
| | Som tyme a Castel of lyme and stone | |
| | And when he likith it voidith anon | |
| | Thus semyth it to many a mannys sight | |
| | Now than conclude I thus yf I mighte | |
| 445 | At orliaince som old felow fynde | |
| | That hadde the monys mansions in mynde | |
| | Or othir magik naturel aboue | |
| | He sholde wel make my brother haue his loue | |
| | For whiche apparence a clerk may make | |
| 450 | To mannys sight that al the rockis blake | |
| | Of Britayne were voydid euerichoon | |
| | And shippis be the brynkis comyn and goon | |
| | And in suche fourme endure a woke or two | |
