| | Whiche in the cloister of thy blisful entrees | |
| | Toke mannys shapthe the eterne loue & pees | |
| 45 | That of thy tryne compas lord and gide is | |
| | Whom heuyn and erthe and se withoute les | |
| | Ay herien and thou virgine doutles | |
| | Baar of thy body and dueldist mayd pure | |
| | The creatour of euery creature | |
| 50 | Assemblid is in the magnificence | |
| | With mercy goodnes and suche pyte | |
| | That thou that art the soune of excellence | |
| | Not only helpist theym that praieth the | |
| | But oftyn tyme of thy benignite | |
| 55 | Ful frely or that man thyn help seche | |
| | Thou gost beforn and art our soulis leche | |
| | Now help thou blisful and meke fair mayde | |
| | Me flemyd wrecche in this desert of gall | |
| | Think on the woman of Canane that sayde | |
| 60 | That whelpis eten som of the cromys small | |
| | That from her lordis table ben y falle | |
| | And though that I vnworthy sone of Eue | |
| | Be synful yet accepte my beleue | |
| | And for that feith is ded withoute werkis | |
| 65 | So forto werkyn yeue me witte and space | |
| | That I be quyt from thens that most derk is | |
| | O thou that art so fair and ful of grace | |
| | Be myn aduocate in that high place | |
| | There as withouten ende is sunge Osanne | |
| 70 | Thou cristis moder doughter dere of anne | |
| | And of thy light my soule in prison light | |
