| | And the Chanon in his hond it nam | |
| | And of that copir he weyed out an vnce | |
| 580 | Al to symple is my tunge to pronounce | |
| | As to mynstir of my wit the dulnes | |
| | Of this Chanon rote of al cursidnes | |
| | He semyd frendly to hem that knew hym nought | |
| | But he was fendly bothe in work and thought | |
| 585 | It werieth me to telle of his falsnes | |
| | And natheles yes wol I it expres | |
| | To that entent that men mowe bewar therby | |
| | And for non other cause trewly | |
| | He put this vnce of copir in his crocelet | |
| 590 | And on the fyre as swithe he it set | |
| | And cast yn powder & made the preest to blowe | |
| | And in his workynge for to stoupe lowe | |
| | As he dede er and al was but a Iape | |
| | Right as hym list the preest he made his ape | |
| 595 | And aftir in the yngot he it cast | |
| | And in the panne put it atte last | |
| | Of watir and yn he put his owen hond | |
| | And in his sleue as ye be forn hand | |
| | Herde me telle he hadde of siluer a teyne | |
| 600 | He slighly took it out this cursid heyn | |
| | Vnwetynge of the preest of this fals craft | |
| | And in the pannys botom he it laft | |
| | And in the watir rumbelith to and fro | |
| | And wondir priuely took it vp also | |
| 605 | The copir teyn nat knowynge the preest | |
| | And hid it and hym hent be the brest | |
