| 665 | Of this receyt fare wel it wolde not be | |
| | Lo thus beiapid and begylid was he | |
| | Thus makith he his introduttion | |
| | To bringe folk to her destruction | |
| | Considerith siris how that in eche astat | |
| 670 | Betwix men and gold ther is debaat | |
| | So ferforth that vnnethis is ther noon | |
| | This multipliynge blindith so many one | |
| | That in good feith y trow that it be | |
| | The cause grettist of suche scarsite | |
| 675 | Thyse philosophris spekyn so mistily | |
| | In this craft that men can nat com therby | |
| | For ony wit that men mowe haue now a dayys | |
| | They mowe wel chateryn as doon Iayys | |
| | And in her termys settyn her lust and peyn | |
| 680 | But to her purpoos shul they neuer atteyne | |
| | A man may lightly lerne yf he haue aught | |
| | To multiplye and bringe his good to naught | |
| | Lo whiche a lucre is in this lusty game | |
| | A mannys mirthe it wol turne vnto grame | |
| 685 | And empte also grete and heuy pursis | |
| | And makyn folk forto purchace cursis | |
| | Of hem that haue her good to hem lent | |
| | O fy for shame tho that haue be brent | |
| | Alas can they not fle the fyris hete | |
| 690 | Ye that it vse I rede that ye it lete | |
| | Lest that ye lese al for bet than neuer is late | |
| | Neuer to thryue were to longe date | |
| | Though ye prolle euer neuer shul ye it fynde | |
