| | This fals Iuge as tellith vs the story | |
| | As he was wont sat in his consistory | |
| | And yaf his domys vp on sondry caas | |
| | This fals chorle cam forth a ful gret paas | |
| 165 | And sayde lord yf it be your wille | |
| | As doth me right vp on my pitous bille | |
| | In whiche I pleyne vp on virginius | |
| | And yf that he wil sey it is not thus | |
| | I wil preue it and fynde good witnes | |
| 170 | That soth is that my bill wol expres | |
| | The Iuge answerid of this in his absence | |
| | I may not yeue diffinyte sentence | |
| | Leet do calle hym and I wol gladly here | |
| | Thou shalt haue right and no wrong here | |
| 175 | Virginius cam to here the Iustices will | |
| | And right anone was red this cursid bill | |
| | The sentence was therof as as ye shul here | |
| | To you my lord Appius so dere | |
| | Shewith your poure seruaunt Claudius | |
| 180 | How that a knyght callid virginius | |
| | Ayenst the lawe and ayenst al equyte | |
| | Holdith expres ayens the wil of me | |
| | My seruaunt whiche that is my thralle be right | |
| | Whiche from myn hous was stolyn on a nyght | |
| 185 | Whylis she was ful yong I wol it preue | |
| | Be witnes lord so that ye nat greue | |
| | She nys nat his doughter what so he say | |
| | Wherfore my lord Iustice I you pray | |
| | Yelde me my thral yf it be your wille | |
