| 415 | Sithnes I may not se you Emelye | |
| | I ne am but ded ther is no remedye | |
| | Vpon that other syde Palamon | |
| | Whan that he wiste arcite was goon | |
| | Suche sorow he makith that the grete tour | |
| 420 | Resouned of his yellyng and his clamour | |
| | The pure feteris on his shynys grete | |
| | Were of his bittir salt teris wete | |
| | Allas quod he arcite cosyn myn | |
| | Of al our strif god woot the fruyt is thyn | |
| 425 | Thou walkist now in thebes at thy large | |
| | And of my woo you yeuest lityl charge | |
| | Thou mayst say thou hast wisedom & manhede | |
| | Assemble alle the folk of our kynrede | |
| | And make warre so sharp on this contre | |
| 430 | That by som auenture or by som trete | |
| | Thou maist haue hir to lady and to wyf | |
| | For whom I muste nedis lese my lyf | |
| | For as by wey of possibilite | |
| | Sithnes thou art at large and of prison fre | |
| 435 | And art a lord gret is thyn auauntage | |
| | More than is myn shit her in a cage | |
| | For I may wepe and wayle whylis that I lyue | |
| | With al the woo that prison may me yeue | |
| | And eke with peyne that loue me yeuyth also | |
| 440 | That doublith al my tourment and my woo | |
| | Therwith the fyre of ielosye vp stert | |
| | With ynne his brest and hent hym by the hert | |
| | So woodly that he likly was to beholde | |
