| | This yonge monk that was so fair of face | |
| | Aqueyntid was so with the good man | |
| 30 | Sith that their first knowlage began | |
| | That in his hous as familier was he | |
| | As is possible ony frend to be | |
| | But for asmuche as this good man | |
| | And eke this monk of whiche I began | |
| 35 | Were bothe two born in on village | |
| | The monk of hym claymeth as for cosinage | |
| | And he ayen saith not onys nay | |
| | But was as glad ther of as foul of day | |
| | For to his herte it was a greet plesaunce | |
| 40 | Thus been they knyt with etern allyance | |
| | And eche of hem gan other forto ensure | |
| | Of brotherhede whyle that her lyf may dure | |
| | Fre was dane Iohn and namly of dispence | |
| | As in that hous and ful of diligence | |
| 45 | To doon plesaunce and also gret costage | |
| | He nat foryat to yeue the leste page | |
| | Whan that he cam sum maner honest thing | |
| 50 | For whiche they were as glad of his comyng | |
| | As foul is fayn whan sonne vp risith | |
| | Nomore of this for it suffisith | |
| | But so be fyl this marchaunt on a day | |
| | Shoop hym to make redy his aray | |
| 55 | Toward the toun of Bruggis forto fare | |
| | To byen there aporcioun of ware | |
| | For whiche he hadde to Paris sent anon | |
| | A messanger and praid hath dan Iohn | |
