| | This cursid Iue hym hent and held faste | |
| | And cutte his throte and in a pit hym cast | |
| 120 | I say that in a warderobe they hym threw | |
| | Where as the Ines purgid her entrayl | |
| | O cursid folk of herodis al newe | |
| | What may your euyl entent you auayl | |
| | Murdir wol out certeyn it wol not fayl | |
| 125 | And namely as the honour of god shal sprede | |
| | The blood out crieth on your cursid dede | |
| | Martir sowdid vnto virginite | |
| | Now maist thou synge folowyng euer in on | |
| | The whyte lamb celestial quod she | |
| 130 | Of whiche the grete euangelist saint Iohn | |
| | In pathmos wroot whiche saith that they goon | |
| | Beforn this lamb & synge a song al newe | |
| | That neuer fleshly woman they ne knewe | |
| | This poure widow awaytith al nyght | |
| 135 | Aftir her litil child and he cam nought | |
| | For whiche as sone as it was daies light | |
| | With face pale and drede and besy thought | |
| | She hath at scole and ellis where hym sought | |
| | Tyl finally so fer she gan to espye | |
| 140 | That he last was seyn in the Iurye | |
| | With modirs pyte in her herte enclosid | |
| | She goth as she were half oute of her mynde | |
| | To euery place where she hath supposid | |
| | By liklihede her child for to fynde | |
| 145 | And euer on cristis moder meke and kynde | |
| | She cryde and at the last thus she wrought | |
