| | She fond her self and eek her doughtryn two | |
| 10 | Thre large sowys had she and nomo | |
| | Thre kyne and eek a sheep that highte malle | |
| | Ful soty was her bour and eek her halle | |
| | In whiche she eet meny a slendir meel | |
| | Of poynaunt sawce nedith her neuer a deel | |
| 15 | Ne deynte morsel passid thorow her throte | |
| | Her diet was accordaunt to her cote | |
| | Repleccion ne made hir neuer syke | |
| | A temperat diet was hir phisyke | |
| | And excercise and hertis suffisaunce | |
| 20 | The gowte lete her no thing forto daunce | |
| | Ne replexion shente not her hed | |
| | No wyn drank she whyte ne red | |
| | Her bord was most seruyd with whit & blak | |
| | Milk & broun bred in whiche she fond no lak | |
| 25 | Salt bacon and somtyme an ey | |
| | For she was as amaner of a dey | |
| | A yerd she hadde enclosid al aboute | |
| | With drye stickis and dichid withoute | |
| | In whiche she hadde a cok highte chauntecleer | |
| 30 | In al the lond of crowyng nas his peer | |
| | His vois was merier than the mery orgon | |
| | On masse dayes that in chirche goon | |
| | Wel sikerer was his crowyng in his loge | |
| | Thanne is a clocke or in ony abbey an orloge | |
| 35 | Be nature he crewe eche assencion | |
| | Of the equynoccion in the toun | |
| | For whenne degrees . xv . were ascendid | |
