| | Vp to the ancle foughte they in her blood | |
| | And in this wyse I lete hem fighting duelle | |
| | And forsoth I wil of Theseus telle | |
| 805 | The destenye mynyster general | |
| | That excusith in the worlde ouyr al | |
| | The purneaunce that god hath beforn | |
| | So strange it is that though þe worlde had sworn | |
| | The contrary of a thing be ye or nay | |
| 810 | Yet somtyme it shal falle vp on aday | |
| | That fallith not eft in a thousand yeer | |
| | For certenly our appetitys heer | |
| | Be it of pees hate warre or loue | |
| | Al is rewlid be the sighte aboue | |
| 815 | This mene I now be mighty Theseus | |
| | That forto hunte is so desirous | |
| | And namely at the grete hert in may | |
| | That in his bed ther dawid hym no day | |
| | That he nys clad and redy forto ryde | |
| 820 | With hunte and horn and houndis be his syde | |
| | For in his huntynge hath he suche delite | |
| | That it is al his ioye and his appetite | |
| | To be hym self the grete hertis bane | |
| | For aftir Mars he seruyth now dyane | |
| 825 | Cleer was the day as I haue told or this | |
| | And Theseus with al ioye and blis | |
| | With his Ipolita the faire quene | |
| | And Emely I clothyd al in grene | |
| | An huntyng ben they riden rially | |
| 830 | And to the groue that stood ther fast by | |
