| | Sayde our hoost so god my soule blis | |
| | Ther is falle on me greet henynes | |
| | Not I nat why . me were leuer to slepe | |
| | Than the best galon of wyne in chepe | |
| 25 | Wel quod the Mauncipyl yf it may do the ese | |
| | To the sir cook and to no wight displese | |
| | Whiche that here riden in this company | |
| | And that our hoost wil of his curtesy | |
| | I wol as now excuse the of thy tale | |
| 30 | For in good feith thy visage is ful pale | |
| | Thyn yen dasowen sothly as me thinkith | |
| | And wel I woot thy breth ful foule stynketh | |
| | That shewith wel thou art not wel disposid | |
| | Of me certeyn thou shalt not be glosid | |
| 35 | Se how he galpith lo this dronkyn wight | |
| | As though he wolde swelle anon right | |
| | Hold cloos thy mouth be thy fader kyn | |
| | The deuyl of helle sette his foot ther yn | |
| | Thy cursid breth enfectith vs alle | |
| 40 | Fy stynkyng swyn foule moot the befalle | |
| | Takith hede sires of this lusty man | |
| | Now swete sire wol ye iuste atte van | |
| | Therto me thinkith ye be wel y shape | |
| | I trow that ye haue dronkyn wyn of ape | |
| 45 | And that is when men pleyen atte straw | |
| | And with his speche the cook wexid al wraw | |
| | And on the Mauncipyl he gan to nodde faste | |
| | For lak of speche a doun the hors hym caste | |
| | Where as he lay til that men hym vp took | |
