| | That vnauysid synnyst giltlees | |
| | O wantrust ful of suspecion | |
| | Where was thy wit and thy discrecion | |
| | O euery man bewaar of rekilnes | |
| 180 | Ne trow no thing withoute witnes | |
| | Smyt not to sone or thou wite why | |
| | And be auysid wel and sikirly | |
| | Or ye do ony execucion | |
| | Vp on your Ire for suspecion | |
| 185 | Allas a thousand folk haue rekil Ire | |
| | Fully fordoon & brought hem in the myre | |
| | Allas for sorow I wil my self sle | |
| | And to the crowe o false theef sayde he | |
| | I wol quyte anon thy fals tale | |
| 190 | Thou song whylom lik an nyghtyngale | |
| | Now shalt thou fals theef thy song forgoon | |
| | Eke thy whyte fetheris euerichon | |
| | Ne neuer in al thy lif shalt thou speke | |
| | Thus shulle men on a treytour be a wreke | |
| 195 | Thou and thyn ofspring euer shul be blake | |
| | Ne neuer swete noyse shul ye make | |
| | But euer crye ayens tempest and rayn | |
| | In tokyn that thorou the my wif is sleyn | |
| | And to the crowe he stert and that anone | |
| 200 | And pullid of his whit fetheris euerichon | |
| | And made hym blak and reft hym al his song | |
| | And eke his speche & out atte dore hym slong | |
| | Vnto the deuyl whiche I hym betake | |
| | And for this caas be alle crowis blake | |
