| | And sikirly ther trowed many aman | |
| | That neuyr sithnes the worlde began | |
| 1245 | As forto speke of knyghthood of her hond | |
| | As fer as god hath made see and lond | |
| | Nas of so fewe so nobyl acompany | |
| | For euery wight that loued chyualrye | |
| | And wolde his thankys haue passing name | |
| 1250 | He prayde that he myghte be of that game | |
| | And wel was hym that therto chosyn was | |
| | For yf ther fyl to morow suche a caas | |
| | Ye knowe wel that euery lusty knyght | |
| | That loueth paramouris and hath his might | |
| 1255 | Were it in engelond or ellis where | |
| | They wolde her thankys willen to be there | |
| | To fight for a lady a benedicite | |
| | Hit were a lusty sighte forto se | |
| | And right so ferthe they with Palamon | |
| 1260 | With hym ther wente knyghtis many oon | |
| | Some wolde be armed in habergeon | |
| | Some in brest place and in bright gippon | |
| | And some wol haue a peir of platis large | |
| | And some wolde haue spruse sheldis & targe | |
| 1265 | Some wolde be armed on his leggis wele | |
| | And haue an ar and a mace of steel | |
| | Ther is no newe gyse but it was hold | |
| | Armed were they as I haue told | |
| | Eueriche aftir his owen oppinion | |
| 1270 | There maist thow se comyng with Palamon | |
| | Ligurge hym self the kyng of trace | |
