| | And er we departen from this place | |
| | I rede we make of sorowis two | |
| | O parfit ioye lastyng euer mo | |
| | And loketh now where most sorow is ynne | |
| 2210 | There wil I first amende and begynne | |
| | Sustir quod he this is my ful assent | |
| | With al the auyse of my parlement | |
| | That gentyl Palamon your owen knyght | |
| | That serueth you with herte and might | |
| 2215 | And euer hath do syn ye first hym knew | |
| | That ye shul of your grace on hym rewe | |
| | And take hym for husbond and lord | |
| | Lene me your hond for this is oure accord | |
| | Let se now of your wommanly pyte | |
| 2220 | He is a kyngis sones brother parde | |
| | And though he were a poure bacheler | |
| | Syn he hath serued you so meny a yeer | |
| | And hadde for you so gret aduersite | |
| | It mot be considered leuyth me | |
| 2225 | For gentyl mercy oughte to passe right | |
| | Than sayde he thus to Palamon the knyght | |
| | I trow ther nedith lityl sermonynge | |
| | To make you assent to this thinge | |
| | Cometh hithir & takith your lady be the honde | |
| 2230 | And thus of hem bothe was made the bonde | |
| | That highte matrimony or mariage | |
| | Be al the counsel of the Baronage | |
| | And thus with al blis and melodye | |
| | Hath Palamon wedded Emelye | |
