| 115 | And thus they ben acorded and y sworn | |
| | To wayte a tyme as I haue told beforn | |
| | Whan Nicholas hadde do thus euerideel | |
| | And thackyd here aboute the lendis wel | |
| | He kiste hir swete and took his sawtrye | |
| 120 | And pleyde faste and made melodye | |
| | Than fil it thus that to the parish chirche | |
| | Cristis owen workis forto werche | |
| | This good wyf wente on an holyday | |
| | Her forhed shoon as brighte as ony day | |
| 125 | So was it wasshe when she leet her werk | |
| | Now was ther of that chirche a parish clerk | |
| | The whiche was y clepyd absolon | |
| | Crulled was his heer and as the gold it shoon | |
| | And strowtid as a fane large and brood | |
| 130 | Ful streyght and euene lay his ioly shode | |
| | His rode was reed his yen gray as goos | |
| | With powlis wyndowes coruen in his shoos | |
| | In hosis reed he wente ful fetously | |
| | I clad he was ful smal and fetously | |
| 135 | In a kirtyl or a lityl waget | |
| | Ful faire and wel be the poyntis set | |
| | And ther vpon he hadde agay surplis | |
| | As whyte as blossom on the rys | |
| | Amery child he was so god me saue | |
| 140 | Wel coude he lete blood and ek shaue | |
| | And make a chartir of lond & aquytance | |
| | In twenty maners coude he tryppe & daunce | |
| | Aftir the scole of Oxenforde tho | |
