| | That was vpon the Carpenters wal | |
| | He syngith in his vois gentil and smal | |
| 175 | Now dere lady . yf thy wille be | |
| | I pray you that ye wil thynke on me | |
| | Ful wel accordyng to his giternyng | |
| | This Carpenter herde hym synge | |
| | And spak vnto his wyf and sayde anon | |
| 180 | What alison herist thou not absolon | |
| | That chauntith thus vnder our bowris wal | |
| | And she answerde her husbond ther with al | |
| | Yes god woot Iohn I here it eueridel | |
| | This passeth forth what wil ye bet than wel | |
| 185 | From day to day this ioly absolon | |
| | So woweth her that he is wo begoon | |
| | He wakith al the nyght and al the day | |
| | He kembith his lockis brode & makith hym gay | |
| | He woweth hir be menes of brocage | |
| 190 | And swoor he wolde be hir owen page | |
| | He syngeth brokyng as anyghtyngale | |
| | He sent aftir pyment methe & spiced ale | |
| | And wafris pypynge hoot out of the glede | |
| | And for she was of toun he profrid her mede | |
| 195 | For som folk wol loue wommen for richesse | |
| | And some for strokis and some for iolynesse | |
| | Som tyme he sheweth his lustinesse & maistrie | |
| | He pleyeth heredes vp on a staffolt hye | |
| | But what auaileth hym as in this caas | |
| 200 | She loued so this hend Nicholas | |
| | That absolon may blowe the buckis horn | |
