| | And out his ars he puttith pryuely | |
| 615 | Ouer the buttok to the shank boon | |
| | And therwith spak this clerk Absolon | |
| | Spek swete brid I not where thou art | |
| | This Nicholas anon let fle a fart | |
| | As gret as it had be a thonder dent | |
| 620 | That with the strook he was almost y blent | |
| | And he was redy with his yren hoot | |
| | And Nicholas amyd the ers he smoot | |
| | Of goth the skyn an hond brede abowte | |
| | The hoote cultre brende so his towte | |
| 625 | And for the smert he wende forto dye | |
| | As he were wood for wo he gan crye | |
| | Help water water help for goddis hert | |
| | This Carpenter out of his slombir stert | |
| | And herde one crye water as he were wood | |
| 630 | And thoughte allas now comyth the flood | |
| | He set hym vp withoute wordis mo | |
| | And with his axe he smoot the corde a two | |
| | And doun goth al he fond neyther to selle | |
| | Ne breed ne ale tyl he com to the selle | |
| 635 | Vp on the floor and there a swoun he lay | |
| | Vp stert alisoun and Nicholay | |
| | And cryde out and harow in the strete | |
| | The neyghebours bothe smale and grete | |
| | In ronnyn forto gawryn on this man | |
| 640 | That yet a swoun lay bothe pale and wan | |
| | For with the fal broste hath he his arme | |
| | But stonde he moste vnto his owen harm | |
