| | They soupen and spekyn of solace | |
| | And dronkyn euyr strong ale atte beste | |
| | Aboute mydnyght wente they to reste | |
| | Wel hath this Myller vernysshed his hed | |
| 230 | Ful pale he was for dronke and nat red | |
| | He yexith and he spekith thorow the nose | |
| | As he were on the quacke or on the pose | |
| | To bedde he goth and with hym goth his wyf | |
| | As ony Iay was she light and iolyf | |
| 235 | So was her ioly whistyl wel y wet | |
| | The cradyl at here beddis syde was set | |
| | To rocken and to yeue the childe sowke | |
| | And when that dawkyn was in the crowke | |
| | To bedde wente the doughter right anone | |
| 240 | To bedde goth aleyn and also Iohn | |
| | Ther is nomore ther nedith hem no dwale | |
| | This Myller hath so wysely bibbed ale | |
| | That as an hors he fuortith and slepe | |
| | Ne of his tayl behynde he takith no kepe | |
| 245 | His wyf bare hym a burdon ful strong | |
| | Men myghte hem here rowtyng a furlong | |
| | The wenche rowted eke par company | |
| | Aleyn the clerk that herde this melody | |
| | He pokyd Iohn and sayde slepist thow | |
| 250 | Herdist thou euyr slyke a song or now | |
| | Lo whilk a complyn is atwene hem alle | |
| | A wylde fyre on her bodyys falle | |
| | Who herde euyr swylk a ferly thing | |
| | Ye they shal haue the flour of yll endyng | |
