| | He hath the Myllars doughter in his arme | |
| 285 | He auntrid and his nedis spedde | |
| | And I ly as a draf sak in my bedde | |
| | And whan this Iape is told anothir day | |
| | I shal be holde a daffe a cokenay | |
| | I wyl a ryse and auntre me be my feyth | |
| 290 | Vnhardy vnsely thus men seyth | |
| | And vp he roos and softly he went | |
| | Vnto the cradyl and in his arm it hent | |
| | And bare it softe vnto his beddis feet | |
| | Sone aftir this the wyf hir rowtyng leet | |
| 295 | And gan awake and wente hir out to pisse | |
| | And cam ayen and gan her cradyl mysse | |
| | And gropid here & there but she fond non | |
| | Allas quod she I hadde almost mysgon | |
| | I hadde almost goon to the clerkis bed | |
| 300 | Do wey benedicite than hadde I foule sped | |
| | And forth she goth til she the cradyl fond | |
| | She gropith alwey ferther with her hond | |
| | And fond the bed & thoughte nought but good | |
| | Be cause that the Cradyl be it stood | |
| 305 | And nyste neuer where she was for it was derk | |
| | But fayr & wel she crepte vnto the clerk | |
| | And lith ful stille & wolde haue caught a sleep | |
| | With ynne a whyle this Iohn vp leep | |
| | And on this good wyf he leyeth on sore | |
| 310 | So mery a fytte hadde not she ful yore | |
| | He prykith harde and sore as he were mad | |
| | This ioly lyf haue thyse two clerkis lad | |
