| | He louyd bettir the nethir ende than the shoppe | |
| | For when ther ony ridyng was in chepe | |
| | Out of the shoppe thyder wolde he lepe | |
| 15 | Tyl that he hadde al the sighte y seyn | |
| | And daunsed wel he wolde not come ayen | |
| | And gadrid hym a meyne of his sort | |
| | To hoppe & synge & make suche disport | |
| | And there they sette steuene forto mete | |
| 20 | To pleyyn at the dyse in suche a strete | |
| | For in the toun was ther no prentyse | |
| | That fayrer coude caste a peyre of dyse | |
| | Than Perkyn coude and therto he was fre | |
| | Of his dispence in place of pryuyte | |
| 25 | That fond his maister wel in his chaffare | |
| | For oftyme he fond his box ful bare | |
| | For shortly a prentis that is a Reuelour | |
| | That hauntith dyse Riot and paramour | |
| | His maister shal it in his shoppe abye | |
| 30 | Al haue he no part of the mynstralsye | |
| | For thefte and riot they be conuertibyll | |
| | Al can he pleye on giterne or Ribyble | |
| | Reuel and trouthe as in a low degre | |
| | They be ful wroth alday as men may se | |
| 35 | This ioly prentis with his maister stood | |
| | Tyl he was neer oute of his prentishod | |
| | Al were he styborn bothe erly and late | |
| | And sumtyme led with Reuel to Newgate | |
| | Where he his vnthriftynes sore aboughte | |
| | But atte laste his maister hym bethoughte | |
