| | She sette her doun & sayde as ye shul here | |
| | Lordinges quod she ye know wel euerichon | |
| | How that my sone is in poynt forto lete | |
| | The holy lawis of our alcaron | |
| 235 | Yeuen by goddis messanger Machomete | |
| | But on a vowe to the grete god I hete | |
| | The lif shal rathir out of my body stert | |
| | Or machometis loue go out of my hert | |
| | What sholde vs tidyn of this newe lawe | |
| 240 | But thraldom to our body and penaunce | |
| | And aftirward in helle to be drawe | |
| | For we reneyed Mahound our creaunce | |
| | But lordis wille ye make assuraunce | |
| | As I shal seyn assentyng to my lore | |
| 245 | And I shal make vs sauf for euyrmore | |
| | They sworyn and assented euery man | |
| | To lyue with hir and dye and by hir stonde | |
| | And eueriche in the beste wyse that he can | |
| | To strengthe her shal his frendis fonde | |
| 250 | As she that hath this empryse take on honde | |
| | Whiche ye shl here as I shal deuyse | |
| | And to hem alle she spak in this wyse | |
| | We shul vs first fayne cristendom to take | |
| | Cold watre ne shal vs greue but a lyte | |
| 255 | And I shal suche a feste and a reuel make | |
| | That as I trow I shal the sowdon quyte | |
| | For though his wyf be cristened neuyr so whit | |
| | She shal haue nede to wasshe awey the rede | |
| | Though she a fonte ful of water with her lede | |
