| 405 | With louys fyue and fisshis two to fede | |
| | God halpe her alwey in her nede | |
| | She dryueth forth in to our occian | |
| | Thorow out our wyde se til at the laste | |
| | Vndir an hold that nemene I ne can | |
| 410 | Fer in Northumbirland the wawys her cast | |
| | And in the sond the ship stickid so faste | |
| | That thens wolde it not al that tyde | |
| | The wil of crist was there she shulde abyde | |
| | The constabil of the castel doun is fare | |
| 415 | To se this wrakke and al the ship he soughte | |
| | And fond this doutif womman ful of care | |
| | He fond also the tresour that she broughte | |
| | In her langage mercy she be soughte | |
| | The lif out her body forto wynne | |
| 420 | Her to deliuer out of the wo that she was ynne | |
| | Amaner latyn corupt was her speche | |
| | But algatis ther by was she vnderstonde | |
| | The Constabil whan hym list no lenger seche | |
| | This woful womman brought he to londe | |
| 425 | She knelith doun and thankith cristis sonde | |
| | But what she was she wold noman sey | |
| | For foul ne fair though she sholde dye | |
| | She said she was so masid in the se | |
| | That she forgat her mynde by her trowth | |
| 430 | The Constabil hath of hir so gret pyte | |
| | And eke his wyf that wepen sore for rowth | |
| | She was so diligent withoute slowthe | |
| | To serue and plese euerich in that place | |
