| | In the name of crist cryde this briton | |
| | Dame Hermegilde yeue me my sighte ageyn | |
| 465 | This lady wax afrayd of that soun | |
| | Lest that her husbond shortly forto seyn | |
| | Wolde here for Ihesu cristis lore haue sleyn | |
| | Til custaunce made her bolde & bad her wirche | |
| | The wil of criste as doughter of holy chirche | |
| 470 | The constabil wexte abasshid of that sighte | |
| | And sayde what amountith al this fare | |
| | Custaunce answerde sire it is cristis myght | |
| | That helpith folk out of the fendis snare | |
| | And so ferforth she gan oure lawe declare | |
| 475 | That she the Constable or it were eue | |
| | Conuerted hath and on crist made hym beleue | |
| | This Constable was no thing lord of this place | |
| | Of whiche I spak ther he Custaunce fonde | |
| | But kepte it strongly many wyntris space | |
| 480 | Vndir alla kyng of al Northumbirlond | |
| | That was ful wyse and worthy of his hond | |
| | Ayens the scottis as men may wel here | |
| | But turne ayen I wil to my matere | |
| | Sathan that euer vs waytith to begyle | |
| 485 | Saw of Custaunce al the perfection | |
| | And caste anon how he mighte quyte her while | |
| | And made a yong knight dwelling in þt toun | |
| | Loue here so hote of foul affection | |
| | That verily hym toughte he shal spille | |
| 490 | But he of here onys mighte haue his wille | |
| | He wowith hir but it auaylith nought | |
