| | Ther is noman that may reporten al | |
| 65 | I wol not tarye you for it is pryme | |
| | And for it is no fruyt but los of tyme | |
| | Vnto my firste tale y wol haue my recours | |
| | And so befil that aftir the thridde cours | |
| | Whyle that this kyng sat in his high nobleye | |
| 70 | Herkenyng his mynstrallis here thing pleye | |
| | Beforn hym at his bord deliciously | |
| | In atte the halle dore sodeynly | |
| | Ther cam a knyght vpon a stede bras | |
| | And in his hond a brood myrrour of glas | |
| 75 | And on his thombe he hadde of gold a ryng | |
| | And be his side a nakid swerd hanging | |
| | And vp he ridith to the high borde | |
| | In al the halle ne was ther spoke a word | |
| | For meruayll of this knyght hym to be holde | |
| 80 | And bisely they wayten yonge and olde | |
| | The straunge knyght that cam so sodenly | |
| | Al armed saue his hed ful richely | |
| | He saluyd the kyng quene & lordis alle | |
| | By ordre as they sitten in the halle | |
| 85 | With so high reuerence and obeisaunce | |
| | As wel in speche as in contenaunce | |
| | That Gawen with his olde curtesie | |
| | Though he com ayeen out of feirye | |
| | Ne coude hym amende with a worde | |
| 90 | And aftir this before the high lord | |
| | He with manly voys sayde his message | |
| | Aftir the fourme vsed in his langage | |
