| | Or he hadde wrought this operacion | |
| | And knew meny a skyl & meny abonde | |
| | This myrrour eke that I haue in myn hond | |
| 125 | Hath suche a myght that men may in it se | |
| | When ther shal falle ony aduersite | |
| | Vnto your regne or vnto your self also | |
| | And openly who is your frend or foo | |
| | And ouer al this if ony lady bright | |
| 130 | Hath set her herte in ony maner wight | |
| | If he be fals she shal his treson se | |
| | His newe loue and al his subtilite | |
| | So openly that ther shal no thing hyde | |
| | Wherfore agayns this lusty someris tyde | |
| 135 | This myrrour and this ring as ye may se | |
| | He sente hath to my lady Canace | |
| | Your excellent doughter that is here | |
| | The vertu of this ring yf ye wol here | |
| | Is this yf that her list it forto were | |
| 140 | Vp on here thombe or in her purs it bere | |
| | There is no foul that fleeth vnder heuyn | |
| | That she ne shal vnderstonde his steuyn | |
| | And knowe his menyng openly & playn | |
| | And answere hym in his langage agayn | |
| 145 | And euery gras that growith vpon the rote | |
| | She shal knowe and whom it wol do bote | |
| | Al be his wounde neuer so deep or wyde | |
| | This nakid swerd that hangith be my side | |
| | Suche vertu hath what man ye smyte | |
| 150 | Thorow out his armure it wol kerue & byte | |
