| | Whiche vnknowe is algate to me | |
| | To speke than of Canaces ryng | |
| 240 | And sayde that al suche wonder thing | |
| | Of craft of ringis herde they neuer non | |
| | Saue that be moyses and be kyng Salamon | |
| | Hadde a maner connynge of suche an art | |
| | Thus seyn the pepyl and drawen hem a part | |
| 245 | But neuertheles some sayde that it was | |
| | Wonder to make of fern glas | |
| | And yet is glas not lik asshen of fern | |
| | But for they haue knowe it so fern | |
| | Therfore secith her iangelinge & her wonder | |
| 250 | As sore wondre som be cause of the thundir | |
| | On ebbe on flood on gossomer & on myste | |
| | And on al thing til the cause is wyst | |
| | Thus iangelyn they and demyn & deuyse | |
| | Til that the kyng gan from his bord aryse | |
| 255 | Phebus hath lost the angil meredional | |
| | And yet ascendyng was the best ryal | |
| | The gentil lioun with his aldryan | |
| | Whan that this tartir kyng Cambuscan | |
| | Roos from his bord there he sat ful hye | |
| 260 | Beforn hym goth the lowde mynstralcye | |
| | Tyl that he cam to his chambir of parementis | |
| | There as they sownyn dyuers instrumentis | |
| | That is lik an heuen for to here | |
| | Now daunsen lusty venus children dere | |
| 265 | For in the fish her lady sat ful hye | |
| | And lokith on hem with a frendly ye | |
