| | That duellith other in wode or in forest | |
| | That wolde haue wept yf he wepe coude | |
| | For sorow of her shriche alwey so lowde | |
| 415 | For ther was neuer yet man on lyue | |
| | Yf that he coude a faucon wel descryue | |
| | Or herde of suche anothir of feirnes | |
| | As wel of plumage as of gentilnes | |
| | Of shap of al that mighte rekened be | |
| 420 | A fawcon peregryn than semed she | |
| | Of fremd lond and euermore as she stood | |
| | She swowned now & now for lak of blood | |
| | Til wel nygh is she fallen fro the tre | |
| | This faire kyngis doughter Canace | |
| 425 | That on her fynger baar the queynte ryng | |
| | Thorow whiche she vnderstood wel euery thing | |
| | That ony foul may in his leden seyn | |
| | And coude answere in his leden agayn | |
| | She hath vnderstonde what this faucon seyde | |
| 430 | And wel nygh for routhe she deyde | |
| | And to the tre she goth ful hastely | |
| | And on this faucon lokith ful pytously | |
| | And held her lappe a brood for wel she wiste | |
| | The faucon muste falle fro the twiste | |
| 435 | Whan that it swowned next for lak of blood | |
| | Alonge while to wayte where she stood | |
| | Til at the laste she spak in this manere | |
| | Vnto the hawke as ye shul aftir here | |
| | What is the cause yf it be forto telle | |
| 440 | That ye be in this furial peyne of helle | |
