| | That is wrappid vnder humble chere | |
| 500 | And vnder hue of trouthe in suche manere | |
| | Vnder plesaunce and vnder besy peyne | |
| | That no wight wolde haue wend he coude feyne | |
| | So depe in greyn he died his colours | |
| | Right as a serpent hidith hym vnder flouris | |
| 505 | Til he may see his tyme forto byte | |
| | Right so this god of loue this Ipocryte | |
| | Doth so his serymoyns and his obeysauncis | |
| | And kepith in semblaunce al his obseruauncis | |
| | That sowneth vnto gentilnesse of loue | |
| 510 | As in a tombe is al the feyr aboue | |
| | And vnder is the corps suche as ye woot | |
| | Suche was this Ipocrit bothe cold and hoot | |
| | And in this wyse he seruid his entent | |
| | That saue the fende noman wist what he ment | |
| 515 | Til he so longe hadde wept and compleyned | |
| | And meny a yeer his seruise vnto me feyned | |
| | Til that my herte to pitous and to nyce | |
| | Al Innocent of his crowned malice | |
| | For ferd of his deth as thoughte me | |
| 520 | Vp on his othis and his suerte | |
| | Graunte hym loue vp on this condicion | |
| | That euermo myn honour and my renoun | |
| | Were saued bothe pryue and apert | |
| | This is to seyn that aftir his desert | |
| 525 | I yaf hym al my herte and al my thought | |
| | God woot and he and other wyse nought | |
| | And toke his herte in change of myn for ay | |
