| 470 | Right in her hawkis leden thus she sayde | |
| | That pyte rennyth sone in gentil herte | |
| | Feling is simylitude in peynes smerte | |
| | Is prouyd alday as men may se | |
| | As wel by work as by auctorite | |
| 475 | For gentil herte kidith gentilnesse | |
| | I se wel that ye haue of my distresse | |
| | Compassioun my faire Canace | |
| | Of verry wommanly benignyte | |
| | That nature in your principlis hath set | |
| 480 | But for no hope forto fare the bet | |
| | But forto obeye to your herte fre | |
| | And forto make other be waar be me | |
| | As by the whelp chastised is the lioun | |
| | Right for that cause and that conclusioun | |
| 485 | Whyle that I haue leyser and spaas | |
| | Myn harm y wil confesse er I paas | |
| | And euer whyle that on her sorow tolde | |
| | That othir wepte as she to water wolde | |
| | Til that the faucon bad hir be stille | |
| 490 | And with a sigh thus she said her wille | |
| | There y was bred allas that day | |
| | And fostrid in a roche of marbyl gray | |
| | So tenderly that no thing aylid me | |
| | I ne wiste what was aduersite | |
| 495 | Tyl I coude fle ful hye vnder the sky | |
| | Tho dwellyd a tarcelet me faste by | |
| | That semed welle of al gentilnes | |
| | Al were he ful of treson and falsnes | |
