| 330 | And with that word they risyn sodenly | |
| | And been assentid anon that he sholde | |
| | Be weddid whan hym list and whan he wolde | |
| | The fantesye and the besy coriousnesse | |
| | Fro day to day gan in the soule impresse | |
| 335 | Of Ianuary aboute his mariage | |
| | Many fair shap and meny fair visage | |
| | Ther passith thorow his herte nyght by nyght | |
| | As who so took a myrour polisshed bright | |
| | And set is in a comyn market place | |
| 340 | Than sholde he se many a figure pace | |
| | Be this myrour and in the same wyse | |
| | Gan Ianuary in his thought deuyse | |
| | Of maydens whiche duellid ther beside | |
| | He wiste not where he mighte abyde | |
| 345 | For though that on haue beaute in her face | |
| | Anothir stont so in the peplis grace | |
| | For her sadnesse and her benignyte | |
| | That of the pepyl greet voys hadde she | |
| | And som were riche and hadde badde name | |
| 350 | But nathelees betwix ernest and game | |
| | He atte laste appoynted hym on on | |
| | And leet alle othir fro his herte gon | |
| | And chose her on his own auctorite | |
| | For loue is blynd alday and may not se | |
| 355 | And when he was in his bedde brought | |
| | He portreyed in his herte and in his thought | |
| | Her fressh beaute and her age tender | |
| | Her myddyl smal & her armys long & slender | |
