| | Of spicis hoot to encrece his corage | |
| 565 | And meny a lectuary hadde he ful fyn | |
| | Suche as the cursid monk dan Constantyn | |
| | Hath writen in his book of coytu | |
| | To ete hem alle he wold no thing escheu | |
| | And thus to his priuy frendis sayd he | |
| 570 | For goddis loue as sone as it may be | |
| | Leet voyde al this hous in curteys wyse sone | |
| | Men dronken and the trauers drew anone | |
| | This brid was brought to bedde as stille as ston | |
| | So hastid Ianuary it most be don | |
| 575 | And whan the bed was with the prest blissid | |
| | Out of the chambir hath euery wight hym dressid | |
| | And Ianuary hath faste in armys take | |
| | His fressh may his paradyse his make | |
| | He lulleth here and kisseth her ful ofte | |
| 580 | With the brustillis of his berd vnsofte | |
| | Lik to the skyn of a fissh sharp as brere | |
| | For he was shaue al newe in his manere | |
| | He rubbith her vpon her tender face | |
| | And sayde thus allas I moste trespace | |
| 585 | To you my spouse and you gretly offende | |
| | Or tyme com that I wyl doun descende | |
| | But natheles considerith this quod he | |
| | Ther is no workman what euer he be | |
| | That may bothe worche wel and hastely | |
| 590 | This wolde be do at leyser parfitly | |
| | It is no force how longe that we pleye | |
| | I trow in wedlok couplid be we tweye | |
